Emut kana cariosan guru simkuring K.H. Cucu Syamsul Millah, S.Sy. yen ari maot sumpingna teu aya kagok. Henteu kagokkeun pedah sumping ka manusa alaatan nuju nanjung/nanjeur, atawa nuju senang-senangna hirup di dunya. Atawa upamana kagok alatan daharna sahuap deui. Tandesna moal tiasa diundur atawa dipaju katangtuan ngeunaan maot ieu sanajan sadetik. Waktuna maot mah, maot bae. Cariosan anjeuna oge kaemut basa nuju biantara dina acara tahlilan tatangga pasantren, saurna kirang langkung yen ari maot eta rusiah Allah, sok katangar ku urang aya nu teu damang, singhoreng jagjag deui, teu lami kalah ka nu maot teh nu jagjag waringkas taya panyawat naon-naon. Atawa hiji jalma umurna panjang tepi ka ampir saabad, malah aya nu leuwih. Sagigireun ti eta aya nu ngora keneh, tos dipundut nyawa ku Nu Kagungan. Malah nembe lahir tos maot. Bakal digilir. Ayeuna urang ngadungakeun tuluy nganteur, tah engke bakal genti urang nu didungakeun tuluy dianteur. Duka iraha, teu aya anu terang. Ngan tos puguh katangtuanna mah moal mencog. Ukur Gusti nu uninga. Dina Q.S. Al-Waqi'ah (56) ayat 60 : "Nya Kami anu geus mastikeun pati di antara maraneh, jeung moal bisa Kami dihalang-halang."
Anjuran yen dina ibadah kedah emut kana maot memang karaos pisan mangfaatna, dina nambah kakhusyuan. Ulah ngemutan enjing bisi maot, malah bade emut mah bisi engke sarengse ibadah urang maot. Jeung tetela teu aya nu terang kana perkara sumpingna maot nu mangrupakeun perkara gaib tea. Ari maot eta hiji kapastian. Ulah urusan maot, urusan lebu sasiki ge mapay hiji kapastian. Kaaos dina Q.S. Al-An'am (6) ayat 59 : "Jeung nya di Anjeunna konci-konci sagala perkara nu goib, teu aya anu nyaho kana konci-konci goib teh salian ti Anjeunna; jeung Anjeunna uninga kana saniskara anu aya di darat jeung di laut, jeung taya daun salambar oge anu murag, jeung taya siki saese oge anu murag dina poekna bumi, jeung taya nu baseuh taya nu garing anging kalawan kauninga ku Anjeunna; angin kabehanana kaunggel dina kitab anu tetela (Lauhil Mahfuzh)."
Dimana emut kana maot dina ibadah insyaAllah bakal nambih kana kakhusyuan. Khusyu nu ieu memang tos aya jaminan, dicindekkeun dina pertanyaan nu kumaha ari nu khusyu teh? Maka dijawab dina Q.S. Al-Baqarah (2) ayat 46 : "(Nyaeta) jalma-jalma anu yakin yen maranehna bakal papanggih jeung Pangeranna, sarta saestuna maranehna bakal marulang ka Anjeunna." Dina Tafsir Al-Azhar Juz I halaman 238-239 kenging Prof. Dr. HAMKA, waktos nafsirkeun ayat ieu nyaurkeun : "Untuk menambah khusyu hendaknya kita ingat, sampai menjadi keyakinan, bahwasannya kita ini datang ke dunia atas kehendak Tuhan dan akan kembali ke akhirat dan akan bertemu dengan Tuhan. Di hadapan Tuhan akan kita pertanggungjawabkan semua amal dan usaha kita selama di dunia. Maka dari sekarang hendaklah kita latih diri mendekati Tuhan. Ibaratnya adalah sebagai apa yang disebut di jaman sekarang dengan kalimat relasi (relation). Datang tiba-tiba saja kita berhadapan dengan Tuhan, padahal makrifat terlebih dahulu tidak ada, dan hubungan kontak jarang sekali, tentu akan membuat bingung, karena tidak ada persiapan. Sampailah Imam Ghazali mengatakan bahwa jika kamu berdiri sembahyang hendaklah sebelum kamu takbir kamu ingat sekan-akan itulah sembahyangmu yang terakhir. Mungkin nanti engkau akan mati, sebab itu engkau khusyukan hatimu menghadap Tuhan."
Kantos kakuping oge ku kuring penjelasan samodel kieu dina nambih kakhusyuan sholat ti hiji ulama di Masjid Al-Muhajirin Universitas Siliwangi, dina hiji kasempetan. Mugi-mugi, ku nancebkeun kayakinan ieu tiasa ngaronjatkeun kakhusyuan sholat/ibadah urang. Aamiin.
Tidak ada komentar:
Posting Komentar